Lucidez terminal: por que algunhas persoas enfermas melloran pouco antes de falecer?

• 17 mayo 2024

Coñezo casos achegados de persoas con algunha enfermidade terminal que, días ou horas antes de morrer, parecían recuperar as súas facultades. A que se debe isto? Samuel Gil.

A investigación científica avanza na procura de explicacións de fenómenos vencellados á morte que escapan ao noso entendemento, como, por exemplo, o que deu en coñecerse como lucidez terminal, ao que moita xente lle chama tamén “a melloría da morte”.

Este é un dos nomes que reciben os episodios repentinos de melloría que experimentan algunhas persoas con enfermidades terminais pouco antes de falecer. Hai pacientes con patoloxías neurodexenerativas como o Alzhéimer que recuperan as capacidades cognitivas a falta de días ou horas para a súa morte.

A ciencia leva anos preocupada por descubrir que ocorre no noso cerebro cando falecemos e existen varias teorías. Unha posible explicación da lucidez terminal, segundo a neuróloga da Universidade de Michigan Jimo Borjigin, é o aumento da actividade neuronal como un esforzo desesperado por resistir.

Outra das teorías que se manexan, sinalada polo profesor da Universidade Estatal de Nova York Sam Parnia, é que o cerebro, ao verse privado de osíxeno e nutrientes, “quita os freos” e pode acceder a recursos aos que normalmente non podería.