O cambio de hora afecta á mortalidade?

• 01 noviembre 2024

Este domingo houbo que atrasar de novo os reloxos e xurdiume unha dúbida. Ten o cambio de hora consecuencias negativas para a nosa saúde? Mercedes Abuín.

O cambio de hora estableceuse no seu momento como unha medida de aforro enerxético, mais xa existe un debate sobre se é realmente necesario. A ciencia sostén que incluso pode ser prexudicial para a saúde e que existe unha correlación positiva cun incremento nas taxas de mortalidade.

Así o avala unha investigación do ‘International Journal of Environmental Research and Public Health’, que recolle datos da cidade de Viena entre 1970 e 2018. Segundo este estudo, a mortalidade total medrou un 3% durante a semana seguinte ao cambio horario de verán.

Isto pode deberse a que os nosos corpos necesitan arredor de cinco días para axustarse a este tipo de alteracións, aínda que nos poidan parecer irrelevantes.

Tal como explica a ciencia, este desequilibrio impacta no noso ritmo circadiano e pode contribuír ao desenvolvemento de determinados trastornos físicos e psicolóxicos, como asma, depresión, diabetes tipo II ou, incluso, ataques ao corazón.