
QUE LEVAR NO FÉRETRO: POSIBILIDADES E LÍMITES
Que limitacións hai á hora de incluír obxectos persoais no féretro? Manuela López.
As principais restricións para esta práctica teñen que ver co que marcan as normas de sanidade e de medio ambiente, especialmente para o caso das incineracións, e tamén co sentido común.
No caso das cremacións, hai máis limitacións por seguridade durante o proceso de combustión e tamén para evitar emisións tóxicas. Nestes procesos pódense incluír sen problema cartas de papel, debuxos, fotos sen marco… pero deben evitarse plásticos, vidros, metais ou aparellos electrónicos, motivo polo cal se teñen que retirar os marcapasos.
Pola contra, se a opción elixida é o enterro, hai moita máis liberdade. Pódense deixar peluches, libros, roupa especial, medallas, obxectos persoais… Iso si, por prudencia sempre se adoita aconsellar non deixar xoias nin reloxos de gran valor económico para evitar posibles problemas ou profanacións no futuro, aínda que a última decisión sempre é da familia ou mesmo da persoa defunta, se o deixou indicado nalgunha conversa ou documento legal.








