Que ocorre se alguén falece a bordo dun avión?

• 03 abril 2026

Vin estes días o do accidente de avión en Colombia, e iso fíxome pensar en se existe algún protocolo cando alguén morre durante un voo. Lorenzo Durán.

En accidentes coma o de Colombia, lamentablemente, é difícil recuperar os corpos, posto que a explosión tende a producir a súa desintegración. Porén, tamén poden darse casos de mortes a bordo dun avión.

Nestas situacións, existe un protocolo moi concreto estipulado pola Axencia Europea de Seguridade Aérea. O primeiro paso é evitar calquera tipo de anuncio para que o falecemento pase desapercibido, de xeito que non se alarmen os demais pasaxeiros.

Durante o voo, a tripulación cubrirá o corpo con mantas para simular que está durmindo, protexéndoo e mantendo o respecto cara ao falecido. Entón, é o capitán o que decide se aterra no aeroporto máis próximo ou completa a viaxe tal como estaba prevista.

O cadáver non poderá ser sacado da nave ata que un médico complete o certificado de defunción. Ademais, se a causa da morte non está clara, o avión pode quedar en corentena ata que se defina esta circunstancia, para previr a expansión de potenciais epidemias.