Seguro de decesos: que ninguén decida por ti

• 31 enero 2025

Meu pai está pensando en contratar un seguro de decesos, pero xórdenos unha dúbida: chegado o momento do seu falecemento, debemos chamar á compañía? Antía Baiona.

Aínda que se teña un seguro contratado, a familia ou seres queridos da persoa defunta teñen todo o dereito a escoller a empresa funeraria que se ocupe do servizo. Deste xeito, o primeiro paso que deben seguir logo da defunción da persoa asegurada é chamar á empresa que elixan, e que os vai asesorar na tramitación diante da compañía de seguros.

A nivel legal, a liberdade de elección nestes casos está recollida en diversos textos legais, coma o artigo 3.1-h da Lei 2/1997 sobre Servizos Funerarios, ou tamén no artigo 106 quáter da Lei 20/2015 de ordenación, supervisión e solvencia das entidades aseguradoras e reaseguradoras.

Deste xeito, ningunha compañía de seguros pode impoñer a selección dunha determinada funeraria en función dos seus propios intereses empresariais, senón que prevalece a vontade que deixara transmitida persoa asegurada ou, no seu defecto, a dos seus seres queridos.