‘Doulas da morte’: así é a figura que axuda a afrontar unha defunción

• 22 marzo 2024

Recentemente escoitei falar dun novo rol profesional coñecido como ‘doula da morte’. Cales son as súas funcións? Roberto Durán.

Na nosa cultura, a morte tense convertido nun gran tabú que provoca que a xente, polo xeral, non estea preparada para afrontala dun xeito san. Para combatelo xurdiu a figura das ‘doulas da morte’ (análoga ás ‘doulas posparto’, máis frecuentes na nosa contorna), que son profesionais que traballan con persoas próximas ao falecemento e coas súas familias.

A súa función é apoialas con axuda a nivel emocional e social, pero tamén práctico. Algunhas ‘doulas’ acompañan con conversas máis directas sobre a morte, mentres que outras centran o seu labor na xestión do dó, por citar algún exemplo.

Este rol colleu impulso logo da pandemia. Así, nos Estados Unidos, a NEDA (Alianza Nacional de ‘Doulas’ do Final da Vida) tiña 260 membros en 2019, mentres que a comezos de 2024 xa sumaba 1545. Tamén existe unha organización global, a INELDA (Asociación Internacional de ‘Doulas’ do Final da Vida), que leva formado a máis de 5600 profesionais dende a súa fundación en 2015.

En España, aínda que non é unha práctica tan habitual como noutras culturas, xa se imparten cursos específicos neste ámbito.