O mesmo féretro con dous cadáveres: restricións que establece a lei

• 23 junio 2023

Pódense enterrar dúas persoas que falezan en data e hora moi próximas empregando unha mesma tumba? Daniel Paz

O Decreto 151/2014, de 20 de novembro, de Sanidade Mortuoria de Galicia establece no epígrafe 3 do seu artigo 21 o seguinte: “o féretro deberá conter exclusivamente o cadáver que se vai inhumar, non podendo depositarse dous ou máis no mesmo féretro”, con dúas excepcións que recolle explicitamente.

Por unha banda, o caso de nais e neonatos falecidos ambos os dous no momento do parto; e, pola outra, no suposto de “sucesos con vítimas múltiples ou situacións epidemiolóxicas excepcionais”.

En calquera caso, o certo é que é pouco frecuente que se produza unha situación coma esta de que unha familia teña ao mesmo tempo dúas persoas que enterrar de xeito simultáneo. E, no caso de darse, en moitas ocasións prefiren que cada cadáver sexa conservado por separado para, deste xeito, poder renderlle os recoñecementos que se desexen de xeito específico. Por exemplo, no caso dun accidente de tráfico no que falezan as dúas persoas do matrimonio, os seus familiares poden elixir que teñan cadansúa sepultura para recibir flores ou outras homenaxes.