O reloxo biolóxico e a súa relación coa morte

• 03 mayo 2024

Hai pouco escoitei que o noso ciclo de sono pode ser determinante para o momento do noso falecemento. É certo? Eva Caamaño.

Aínda que prever a data exacta da morte é imposible (polo menos polo de agora), a ciencia non deixa de avanzar e cada vez atopamos máis pistas que nos poden axudar a facer estimacións sobre o final das nosas vidas. Unha delas podería estar nos ritmos circadianos e o noso reloxo biolóxico, que é o mecanismo interno que lle permite a un ser vivo ter unha orientación temporal: a preferencia por madrugar ou quedar esperto ata ben entrada a noite é algo que parece herdarse, o que suxire que o noso ritmo de sono está vencellado a algún factor xenético.

Esta mesma variante é a que, segundo o estudo “A common polymorphism near PER1 and the timing of human behavioral rhythms”, publicado na revista Annals of Neurology e impulsado pola facultade de Medicina de Harvard, podería influír no momento do día no que é máis probable que falezamos.

A este respecto, a investigación demostrou que as persoas con xenotipos (isto é, o conxunto de información xenética almacenada no ADN e que define a un individuo) coma o AA ou o AG tenden a morrer antes das 11:00, mentres que as do xenotipo GG preto das 18:00.