Por que hai cipreses nos cemiterios e por que simbolizan a morte?

• 24 abril 2026

Na maioría dos cemiterios que visitei na miña vida vin algún ciprés. Por que é tan común a presenza desta árbore nestes lugares? Carlota Vázquez.

A presenza dos cipreses nos cemiterios ten unha dobre explicación: unha é científica e está relacionada coas características da árbore e outra é mitolóxica e deriva de antigas crenzas e lendas gregas e romanas.

Se atendemos á primeira, vemos que o ciprés é moi lonxevo –pode chegar a vivir ata 300 anos– e medra axiña. Ademais, a súa folla é perenne, resiste ben os cambios de temperatura e as súas raíces medran de xeito vertical, polo que non require ningún coidado especial. Así mesmo, a súa altura axuda a protexer os muros do camposanto do vento.

Pola outra banda atopamos a xustificación mitolóxica: as civilización grecorromanas crían que, pola súa forma, os cipreses guiaban as almas dos falecidos cara ao ceo, mentres que a súa folla perenne simbolizaba o eterno. Por iso adoita relacionarse esta árbore co dó ou cun símbolo funerario.