Por que se acenden candeas nos rituais funerarios?

• 29 mayo 2026

Unha práctica frecuente en calquera ritual funerario é a de acender candeas. Por que é algo tan común? Montse Caamaño.

O feito de acender unha candea agocha un simbolismo moi vinculado a diferentes concepcións culturais e relixiosas que fixeron que se conservara ata o día de hoxe.

A interpretación máis antiga ten que ver co papel da luz como guía para a alma da persoa falecida cara ao descanso final ou a vida eterna, xa sexa dende un punto de vista espiritual, como ocorría nas civilizacións grecorromanas, ou relixioso, como no contexto cristián.

Na antigüidade tamén se cría no poder protector do lume. Culturas como a celta ou a nórdica empregaban o lume para manter lonxe os espíritos malignos que quixeran achegarse ao mundo dos vivos.

Porén, para moita xente, especialmente na actualidade, as candeas empréganse como unha maneira de preservar o recordo da persoa defunta ou como símbolo de transformación, entendendo a morte como un novo comezo.