Por que se representa a morte cunha gadaña?

• 06 febrero 2026

Acotío identificamos a morte cun esqueleto que leva unha gadaña. De onde vén esta representación? Raquel Couceiro.

No imaxinario colectivo da nosa sociedade, esta representación da morte como un esqueleto cunha gadaña simboliza a disposición de “segar” a vida das persoas.

Como sucede con numerosas crenzas e tradicións populares, este xeito de darlle forma física á morte remóntase, segundo distintos expertos, á mitoloxía grega; concretamente debémosllo a unhas figuras divinas coñecidas co nome de “moiras”, que se encargaban de decidir sobre a existencia das persoas.

Eran tres: Cloto tecía o fío polo que transcorría a vida, Laquesis determinaba a lonxitude do fío e Átropos tiña unhas tesoiras coas que o cortaba, poñendo, deste xeito, o punto e final.

Da mitoloxía grega pasaron á romana baixo o nome de “parcas” e, posteriormente, esta historia fusionouse coa do deus celta Ankou, representado cun esqueleto. Entón, a tesoira de Átropos pasou a ser unha gadaña, xa que se trata dunha ferramenta habitual entre os campesiños.