Seguro de decesos: que ninguén decida por ti

• 26 abril 2024

Miña nai ten contratado un seguro de decesos. Cando chegue o momento, pode a compañía obrigarnos a elixir unha empresa funeraria en concreto? Berta Gómez

Ningunha aseguradora pode, en ningún caso, impoñer a contratación dunha empresa funeraria en concreto. Así o avalan distintas leis, como o artigo 3.1-h da Lei 2/1997 sobre Servizos Funerarios ou o artigo 106 quáter da Lei 20/2015, que recolle que “as entidades aseguradoras deberán poñer a disposición do asegurado unha relación de prestadora de servizos que garanta unha efectiva liberdade de elección”.

Na práctica, o que ocorre é que as multinacionais que operan no sector funerario teñen unha estreita relación con aseguradoras, ata o punto de que moitas veces esta vinculación é mesmo legal ou de dependencia. Isto leva ás compañías a, polos seus propios intereses empresariais, encamiñar ás familias a encargar o servizo a unha determinada funeraria.

Porén, esta práctica non é legal: sexan cales sexan a causa ou o lugar do falecemento, o aconsellable sempre é chamar primeiro á empresa funeraria que se prefira e que sexa esta quen oriente como proceder á tramitación coa compañía aseguradora.