Sentir alivio tras a morte dun ser querido: fóra remordementos de conciencia

• 14 abril 2023

Despois de que falecera un familiar a consecuencia dunha longa enfermidade, sentín certo alivio. Debo preocuparme? Noelia Díaz

Experimentar esa sensación é algo máis común do que pensamos, especialmente naqueles casos nos que a morte do ser querido é consecuencia dunha longa enfermidade diagnosticada, unha circunstancia que nos permite prepararnos mellor para a xestión emocional dese desenlace.

É o que se chama “dó anticipado”, que se produce cando as persoas da contorna empezan a asumir a perda de quen está enfermo á vista do deterioro que vai experimentando e tamén da interrupción da súa vida habitual polas novas circunstancias que impón esa doenza.

Como é lóxico, isto transcorre en paralelo ao desgaste físico e emocional que conleva o acompañamento diante dunha situación de merma das capacidades habituais ou de tratamentos médicos coma os oncolóxicos.

Deste xeito, debemos normalizar o feito de sentir ese alivio, tanto dende a ollada da observación da persoa enferma, quen deixa de sufrir, como dende a dos seus familiares. Aínda que moita xente evita falar disto por vergoña ou por experimentar unha certa culpabilidade, cómpre entender esa emoción de liberación, que non implica en ningún caso un menor afecto ou respecto cara á persoa falecida.