Existe o dó sen a morte?

• 28 noviembre 2025

O dó é un proceso vinculado á morte, pero poden experimentarse sensacións parecidas sen que faleza ninguén? Ezequiel Pereira.

Efectivamente, o dó asóciase á morte, mais se atendemos ao que di o dicionario vemos que a perda dun ser querido non ten por que ser unicamente a causa do que se define como “sentimento de dor ou mágoa por algunha cousa”.

Persoas expertas no eido da psicoloxía sinalan que é posible atravesar procesos similares noutras situacións, como unha ruptura, un despido no traballo ou a desaparición dun día para outro de alguén a quen estás coñecendo –práctica coñecida actualmente como ‘ghosting’–, por exemplo.

A incerteza, a busca de respostas ou a desesperanza que experimentamos nestes casos poden desencadear emocións intensas que gardan similitude coas provocadas polo falecemento dun achegado.

Sexa cal sexa o motivo, é fundamental recoñecer o antes posible o estado no que nos atopamos para, a partir diso, traballar na superación do dó con paciencia e apoio nas persoas que nos rodean.